LIA NAIN SIRA-Lia nain uma lisan Boroloi-loime Knua Nunu Malau foto hamutuk hafoin asisti formatura kontinensia husi grupo Drum band ba matebian Antonio Soares iha Nunu Malau, Kinta (8/8/2013)
Tuir adat municipio Ainaro hatun feto foun husi ninia uma lisan ba uma lisan mane foun nee, disipilina tebes katak, katuas lia nain sira husi feto foun ho umane sempre respeitu malu. Realidade ida nee mosu iha uma lisan Boroloi-Loime Knua Nunu Malau ho katuas lia nain sira husi uma lisan Mau Lua-Laluwo.
Ida nee sorumutu nebe exlusivu teb-tebes tamba antes nee, katuas lia nain sira husi uma lisan rua nee konsege iha konkordansia ona, entaun iha etapa sorumutu ida nee, husi feto san sira atu kompleta deit sasan lulik nebe mensiona.
fetosan sira entrega barlaki ba umane hanesan tradisaun ida nebe hatun nanis iha tempu pasadu, nebe iha dialogu nee, feto foun ho mane foun la besik iha serimonia konferensia nee. Bain hira umane sira halot ona sasan lulik nebe oferese husi katuas lia nain fetosan nian, mak katuas lia nain sira bolu sira nia oan feto ho mane fou atu akompania serimonia nee iha fatin konfrensia.
Feto foun ho mane foun tur ona iha fatin konferensia nee, katuas lia nain husi mane foun nebe reprezenta uma lisan Mau Lua-Laluwo, informa sa lulik nebe presiza feto foun ho mane foun kumpri durante serimonia hatun feto foun.
Antes tama iha serimonia despedida hatun feto foun husi uma lisan Boroloi-Loime Knua Nunu Malau ba uma lisan Mau Lua-Laluwo, hahu loron 3 no kalan tolu nia laran, feto foun la bele kaer batar musan ou han batar, tuir uma lisan Laluwo. signifika la bele hakbesik batar tamba batar nee reprezenta ema nia isin lolon nebe hatur nanis kedan iha tempu pasadu tuir uma lisan Laluwo.
sorumutu nee halao iha uma lisan Boroloi-loime knua Nunu Malau loron Kuarta Feira (7/8/2013), iha etapa primeiru hakotu lia adat kona ba prosesu hatun feto foun husi ninia uma lisan ba uma lisan mane foun.
Hafoin sorumutuk remata iha etapa Primeiru, katuas lia nain sira husi uma lisan Boroloi-Loime Knua Nunu Malau ho lia nain uma lisan Mau Lua-Laluwo halao serimonia almosu hamutuk.
Iha nee familia umane sira prepara aihan ba katuas lia nain sira husi uma lisan Mau Lua-laluwo. Bain hira almosu, familia husi parte rua nee kria amizade nebe furak teb-tebes, idak-idak hateke ba aihan hirak nebe iha hadak leten hanesan etu ho modo hodi konsumu no hemu tua sabu, tintu no aihan seluk nebe oferes iha hadak leten, fatin konferensia adat husi uma lisan rua nee.
Hafoin konsumu aihan hirak nee remata, inan feto sira husi umane no mane foun lolo lohu mama nebe tau ona buah, malus nomos ahu hodi mama no fahe malu.
Preprara Sasan Lulik Hatun Feto Foun
Bain hira katuas lia nain sira husi umane no mane foun fahe malu ona, inan aman no familia tomak husi uma lisan Boroloi-Loime knua Nunu Malau, komesa prepara sasan lulik nebe atu utilize hodi hatun sira nia oan feto husi ninia uma lulik, atu ba hasae fali iha uma lisan mane foun nia.
Iha nee, Angelina Joaninha Saldanha nia Inan rasik, prepara tais feto nebe atu hatais ba nia oan feto maka hanesan tais feto rua, bringkus, mortel, korenti osan mean, gelang mas, no tais feto mane lubuk ida hodi entrega ba sira nia oan feto atu nune’e to’o nia uma lisan bele fahe ba ninia banin sira iha uma lisan Malu Lua-Laluwo.
Liu tiha loron tolu, tuir tempu nebe determina ona iha konfrensia kulturais lia nain sira husi umane ho mane foun, feto foun ho nia banin sira komesa mai ona iha uma lulik feto foun nian iha knua Nunu Malau, feto foun nia banin sira tama ho formatura rapidu, mane foun nia alin ida lori bibi aman ida no entrega ba umane sira.
Bain hira familia mane foun tama ona iha area uma lisan feto foun knua Nunu Malau, umane sira prepara ona hadak ida nebe besik uma lisan Boroloi-Loime hodi tur hein prosesu hatais feto foun iha ninia uma lisan husi ninia inan aman sira.
Feto foun nia inan aman komesa hatais ona sira nia oan feto iha ninia uma lulik Boroloi, hanesan hatais tais feto nian iha tais liur no tais laran, sui fuk ho raspidu, tau bringkus iha nia tilun, kahe korenti osan mean no mortel iha kakorok, haklili kohe no sasan seluk lulik seluk nebe umane sira oferese ba sira nia oan feto.
0 comments:
Post a Comment